ВИДЕО: Граѓани и вечерва се собраа пред Владата, протестираат против францускиот предлог
Неколку десетици граѓани доцна попладнево се собраа пред зградата на Владата, барајќи оставки од политичарите од власта кои најавија прифаќање на документот подготвен од француското претседателство со ЕУ, со кој земјава треба да го реши спорот со Бугарија и да ги почне преговорите за членство во Европската унија.
Таканаречениот „француски предлог“ вчера пристигна во Владата, а денеска напладне беше објавен во оригиналната форма на владината веб-страница.
Премиерот Димитар Ковачевски истакна дека со него се зачувува македонскиот јазик и идентитет.
„Позицијата во која се наоѓаме е далеку поповолна за нас. Пред нас имаме предлог кој ги инкорпорира нашите забелешки. Ќе дебатираме и во Парламентот, со опозицијата и со севкупната јавност. Предлогот е солидна основа за градење сериозен, одговорен и државнички став. Сите лажни тврдења во различни форми потонаа, го штитевме македонскиот интерес и идентитет. Во европскиот предлог има позиции за целосно прифаќање на македонскиот јазик, како и протоколот да не биде во преговарачката рамка. Нашата позиција за почнување на преговорите и Првата меѓувладина конференција е инкорпориран во предлогот доставен кај нас“, порача Ковачевски.
Опозицијата за утре најави „Сенароден протест против бугаризацијата“, кој исто така ќе се одржи пред Владата.