Фудбалерите на Лацио денеска на домашен терен ја совладаа Џенова со 4:3 во рамките од 34 коло во најквалитетната италијанска лига.

За гостите во составот на мечот на „Олимпико“ не беше македонскиот репрезентативец Горан Пандев поради жолти картони. После првото полувреме водеше римскиот клуб со 2:0, головите беа дело на Кореја во 30 и Имобиле од пенал во 43 минута.

На стартот од вториот дел намали Џенова после автоголот на Марушиќ, но веднаш потоа следуваа уште два погодоци во мрежата на Перин, стрелаа Алберто и Кореја кој го запиша и вториот гол во 56 минута.

Гостите само за момент успеаја да ги одржат надежите за поволен резултат, за неполни две минути реализираа преку Скамака (овој првиот од белата точка) и Шомудоров, но тоа не беше доволно да се спречи 14 пораз сезонава.

На табелата во Серија А Лацио е на шестата позиција со 64 бодови и останува во игра за едно од местата кои водат во Лигата на шампионите, а Џенова е на 13 место со 36 бодови.