ВИДЕО | Глигоров: Финансиски ова е најлоша година за „Скопско лето“

Никола Глигоров
Никола Глигоров , „Скопско лето“ / Утрински брифинг

„Скопско лето“ традиционално започнува на првиот летен ден, 21 јуни, и завршува на 31 јули поради што е најдолгата културна манифестација. По пандемиските години луѓето сега сакаат да излезат и да посетат концерти, изложби и други културни манифестации.

-Скопско лето во пандемиската 2020 година беше посветено на домашните уметници и нашата публика со радост ги проследи. Голем дел од познатите уметници кај нас биле дел од Скопско лето и тоа било битно и за уметниците и за манифестацијата. Така летото во Скопје повеќе не е мртва сезона туку со Скопско лето е сезона во сезона, вели  Никола Глигоров, директор на Дирекција за култура и уметност која е организатор на познатата манифестација „Скопско лето“ за Утрински брифинг.

Оваа година е веројатно најтешката година на Скопско лето, вели Глигоров и додава дека на располагање за годинава имаат само 400.000 денари доделени од Министерството за култура.

-Дирекцијата за култура и уметност со години наназад конкурирала во различни културни сфери на Годишната програма на Министерството за култура за финансирање на проекти. Сега се променија правилата и ограничено е конкурирањето на два проекта. Не знаеме со колку средства ќе нѐ поддри Град Скопје. Ние разбираме каква е состојбата во светот и кај нас, ама културата не смее да трпи. Ако ние престанеме да произведуваме култура, ќе трпи нацијата, вели Глигоров.

Тој вели дека манифестацијата „Скопско лето“ треба да има основа и дека не смее да биде третирано како проект затоа што станува збор за институција. Затоа лани е склучен двегодишен договор со Град Скопје за неколку културни манифестации.

-Очекувавме сега да се сретнеме со администрацијата на градот да слушнеме дали се задоволни од тоа како сме ги реализирале нашите проекти и дали ќе продолжи соработката. Очекувам дека тоа наскоро и ќе се случи и дека градот ќе продолжи да нѐ финансира со 1,5 милиони денари, вели Глигоров.

Со Француската амбасада и Францускиот културен центар „Скопско лето“ организира концерт на европски оркестар што ќе се одржи на 21 јуни со почеток во 20.30 часот во Националната опера и балет со што манифестацијата ќе биде официјално отворена.

Проследете го целиот разговор во видеото

Видео на денот