Во гламурозна атмосфера, со црвен тепих и многу српски, но и балкански ѕвезди на него, вечерва во Белград се одржа премиерата на долгоочекуваниот биографски филм „Тома“, кој го бележи животот на големиот боем и музичар, Тома Здравковиќ.

Филмот, во режија на Драган Бјелогрлиќ, ја имаше првата премиера во Сараево кон крајот на минатиот месец, а потоа беше прикажан и во Ниш, пред вечерашната белградска премиера во „Сава центар“ во српската престолнина.

Додека ѕвездите дефилираа на црвениот тепих, можеа да се слушнат бројните хитови на Тома Здравковиќ, чија музика е омилена и во Македонија, како и насекаде на просторите на поранешна Југославија.

Покрај екипата на филмот, на премиерата присуствуваа и Жељко Јоксимовиќ, Миа Бјелогрлиќ, Анѓелка Прпиќ, Анастасија Ражнатовиќ…

Филмот „Тома“ е биографски портрет на Тома Здравковиќ, кој ги прикажува неговите почетоци и средбата со музичката сцена, како и врвот на неговата слава. Прикажани се и неговите бројни љубовни врски, кои ја инспирирале неговата музика.

Во главните улоги, како Тома Здравковиќ и Силвана Арменулиќ, се Милан Мариќ и Тамара Драгиќевиќ, а покрај нив играат и Петар Бенчина, Сања Марковиќ и Паулина Минов, а во улогата на мајката е српската актерска легенда, Мирјана Карановиќ.

Сценариото е на Никола Пејаковиќ, Зоран Лисинац, Драган Бјелогрлиќ и Маја Тодоровиќ.