Во вториот натпревар во СЕХА Газпром лигата Еурофарм Пелистер загуби вечерва на гостувањето кај ППД Загреб со 26:23 (11:14). Тоа е прв пораз за играчите на тренерот Жељко Бабиќ во групата „А“, моментно се наоѓаат на второто место со три бода, зад водечкиот ППД Загреб (шест), а без бодови се Металопластика и Татран Прешов.

Тимот од Битола одлично го започна мечот, воглавно го контролираше резултатот и највисоката предност во првото полувреме изнесуваше 9:13 за македонската екипа.

И стартот на вториот дел ветуваше дека конечно на прав начин како што доликува ќе блесне Еурофарм Пелистер и против едно големо име на ракометната мапа, какво што е хрватскиот ППД Загреб, откако на семафорот стоеја и највисоки 12:17 и тука како да застана „магијата“ на гостите.

Повторно онаа слика од минатото, со многу добар старт и наместо постепено одржување на водството, истото беше анулирано во важен период од второто полувреме.

При 12:17 домаќинот направи серија од 5:0 за израмнување, истата ја прекина Кукуловски за 17:18 и тоа беше последната позитива која ја имаше нашиот претставник.

Се играше гол за гол, во 49 минута Радовиќ израмни на 20:20, а потоа кога е најпотребно следуваше нов пад на концентрацијата, четири гола во низа за Хрватите што беше и можеби клучен момент за кршење на сите надежи, веќе како да се откажаа играчите на Еурофарм Пелистер и крајот се помирија со првиот пораз сезонава во регионалното натпреварување.

Кај стрелците во редовите на ППД Загреб Буриќ запиша пет голови, по еден помалку Вистороп и Мраковчиќ. На спротивната страна доминираше Периќ со седум погодоци, четири забележа Граџан, додека голманот Чаневски имаше девет одбрани, а запре и еден седмерец.

Следните предизвици за Еурофарм Пелистер се во Лига Европа, односно на домашен терен во Битола на 10 и 11 февруари ќе игра два натпревари против унгарската екипа на Татабања.