Се одиграа уште седум натпревари во рамките од 29 коло во најсилното италијанско првенство, Удинезе загуби на гостувањето кај Аталанта, а Наполи со 4:3 триумфираше дома над Кротоне.

На дуелот во Бергамо во тимот на Удине беше македонскиот репрезентативец Илија Несторовски, но не настапи. Муриел ги постигна првите два гола за Аталанта, намали Перејра непосредно пред паузата. За 3:1 се погрижи Запата после асистенцијата на Малиновски, а противникот само успеа да го ублажи поразот (71`, Стригер Ларсен).

Наполи потешко од очекувањата дојде до бодовите, водеша со 2:0 преку Инсиње и Осимхен, намали Кротоне во 25 минута (Сими), а во 34 минута за домаќинот стрелаше Мертенс.

Во вториот дел следуваа два гола на гостите, Сими одново се запиша во листата на стрелците, израмни Месиас, а триумфот за составот на Гатузо го донесе Ди Лоренцо после асистенцијата на Елиф Елмас во 72 минута. Нашиот играч настапи од 62 минута како замена за Бакајоко.

Во составот на Џенова и ремито против Фиорентина (1:1) не беше Горан Пандев кој во изминатиот период заедно со Елмас и Несторовски беа со обврски во националната А репрезентација.

Во другите натпревари од рундата: Беневенто-Парма 2:2, Каљари-Верона 0:2, Лацио-Специја 2:1 и Сасуоло-Рома 2:2. На табелата Наполи е на четвртото место со 56 бодови, Удинезе е на 12 позиција со 33, еден повеќе од Џенова на 13 место.