ВИДЕО: „Два во еден“ на Олимпико, шампионот на колена во Рим
Фудбалерите на Лацио го победија Интер со 3:1 (0:1) во дерби натпреварот од осмото коло во италијанската Серија А.
„Нераѕурите“ поведоа во 12 минута со голот на Перишиќ од пенал. Претходно, Хисај имаше контакт со Барела во шеснаесетникот на Лацио, што беше доволно судијата Масимилијано Ирати да покаже на белата точка. До крајот на првиот дел, немаше промена на резултатот.
Во второто полувреме беше досуден пенал за Лацио, кој го претвори Имобиле во гол во 64 минута на стадионот „Олимпико“ во Рим.
Патрик после корнер со глава ја зафати топката, која потоа ја погоди раката на Бастони, што беше потврдено и од ВАР собата.
Во 81 минута Лацио дојде во предност преку Фелипе Андерсон. Претходно, Димарко остана да лежи на тревата, играчите на Лацио ја продолжија акцијата, Имобиле шутираше, Хандановиќ одбрани, а Фелипе Андерсон го искористи одбивањето и ја испрати топката во мрежата.
Во првата минута од судиското надополнување во второто полувреме, Лацио имаше слободен удар од десната страна, Фелипе Андерсон имаше одличен центаршут, а Сергеј Милинковиќ Савиќ беше највисок во скокот и го постави конечниот епилог.
Ова е прв пораз на Интер сезонава, додека Лацио стигна до четвртиот триумф. Претходно Специја со 2:1 пред своите навивачи ја совлада Салернитана.