Фудбалерите на Реал Мадрид го совладаа Елче со 2:1 во 27. коло во Ла Лига и го продолжија трендот од оваа сезона, да се мачат со екипите во долниот дел од табелата.
Првото полувреме заврши без голови, а единствената шанса ја имаше Карим Бензема чиј шут заврши покрај голот на гостите.

Во 61. минута фудбалерите на Елче ги „шокираа“ фудбалерите на Реал Мадрид, Калво беше највисок во скокот по одлично изведениот корнер и со глава го совлада Тибо Куртоа.
Во тој момент, тренерот на Реал Мадрид, Зинедин Зидан, се одлучи на дури три измени, во игра влегоа Модриќ, Родриго и Крос со што се забрза играта на Реал и тоа брзо даде резултат.
Токму по нафрлањето на Модриќ, Карим Бензема во 73. минута донесе израмнување, а истиот фудбалер во 91. минута го постигна победничкиот гол со кој Реал остана на третото место на табелата со 56. бода, шест помалку од лидерот Атлетико Мадрид и еден помалку од Барселона која има и натпревар повеќе.