Пред да тргнат на својата прва регионална турнеја, каде ќе настапат како поддршка на „Луфтанза“, младиот скопски бенд „Харакири“ објави спот за својот прв сингл од деби ЕП-то „Харакири“.

Бендот „Харакири“ е формиран во 2022 година како трио од Скопје. Членови на бендот се Андреј Димовски – гитара и вокал, Марко Печеновиќ – бас и вокал, и Виктор Стојановски – тапани.

Музиката што ја создаваат се движи во границите на алтернативниот рок. Првиот сингл што го објавија на Јутјуб е со наслов „Спротивниот крај“, а спотот е снимен на улиците во населбата Карпош 1 во Скопје.

Во рамките на турнејата со „Луфтанза“ заедно ќе настапат во Белград, Нови Сад, Зрењанин, Суботица и Загреб од 25 до 30 март.

Своето деби ЕП, кое содржи четири песни, „Харакири“ ќе го објават на 20 април на Бендкемп.