Денеска во првиот натпревар од саботната програма на 27 коло во Премиер лигата Арсенал ремизираше на гостувањето кај Барнли (1:1).

Двата погодоци беа реализирани во текот на првото полувреме, „топџиите“ поведоа со погодокот на Обамејанг уште во шестата минута после асистенцијата на Вилијан.

Интернационалецот од Габон постигна повеќе голови против Барнли (осум) од било кој друг англиски тим во неговата кариера, додека Бразилецот Вилијан има повеќе премиерлигашки асистенции оваа сезона од било кој друг играч на Арсенал (пет).

Израмнувањето се случи во 39 минута, Џака имаше намера да ја додаде топката до еден од неговите соиграчи, но удри во Вуд кој беше во казнетиот простор и топката од неговото тело заврши во мрежата на Лено.

Составот на Микел Артета после петтото реми сезонава се наоѓа на 10 позиција со 38 бодови, додека денешното реми е добредојдено за Барнли во борбата за опстанок, моментно е на 15 позиција со 30 бодови.