Законите од казнено-правната област треба да се прочистат и променат. Законот за кривична постапка има цела деценија како што правно се развива и низ текот на времето се појавуваат интервенции кои треба да ги рефлектираат механизмите за непречено одвивање на судските процеси. Имаше цела група која работеше и на донесување на измените и дополнувања на тој закон. Работата заради кризата беше застаната, но сега и од Министерството за правда гледам дека имаат намера на поинтензивно продолжување, изјави во Утрински брифинг, професорката на Универзитетот на ЈИЕ Беса Арифи.

-Во подготовка е нов Кривичен закон и тука ќе има еден покрупен зафат бидејќи овој закон е од 1996 г. Двете групи започнуваат со работа овие недели и јас очекувам интензивирање на процесот кој беше стопиран од виша сила – ковид-19, но веќе не смееме да си дозволиме луксуз да доцниме со реформите кои се клучни за казнено-правниот систем, вели Арифи.

-Испорачувањето на правдата беше една од главните цели на промената која се случи во С Македонија од 2016 година, со составувањето на тогашната нова влада. Можеби очекувањата беа преамбициозни, затоа што после децениски заробена држава тешко е да се испорача правдата на ниво на очекувањата. Сепак има големи промени. Има многу поголема отвореност и целта се гледа дека е да се испорача правдата. Сите знаеме дека реформите во правосудството се клучен сегмент во пристапувањето кон ЕУ. Не треба да оочекуваме правдата да ја испорачува само Владата. Таа треба да ја испорачуваат судовите. Не може да очекувате премиер да суди. Но тоа беше реалноста во државава до пред четири години, вели професорката.

Целиот разговор со професорката Арифи погледнете го во видеото: