ВИДЕО | Ангелов: Кинотеката го издаде првото двд со кратки македонски филмови

Новото ДВД издание на Кинотеката на Северна Македонија содржи триесет краткометражни играни филмови создавани од 1957 година до денес. Ова е прва компилација на кратки филмови што ја издава Кинотеката и ќе биде промовирано на фестивалот на македонски филмови „Златна рамка“.
„Секако во ова ДВД издание се правени многу компромиси затоа што се вклучени само триесетина филмови и автори, а има многу повеќе. Ова е само почеток, прво издание кое ќе биде само вовед во следни изданија каде што континуирано ќе ги претставуваме македонските краткометражни играни филмови и на тој начин ќе ја афирмираме македонската кинематографија и секако ќе продолжиме да објавуваме изданија кои ќе се однесуваат и на долгометражните играни филмови. Потребни се релевантни материјали со цел квалитетот да биде многу подобар. Значи не е ова последно издание посветено на кратките филмови. Можеби некој ќе се зачуди зошто овој филм не е вклучен, а е вклучен некој друг, но ќе продолжиме со овие изданија, ова не е последното“, вели за Утрински брифинг, Владимир Ангелов, директорот на Кинотеката.
Тој информираше дека со проекција на документарниот филм „Форте“ од програмата на фестивалот „Вечери на женски права“, на 14 мај (петок), започнува со работа летното кино под отворено небо „Мирно лето“ – во дворот на Кинотеката. „Оваа година решивме порано да го отвориме летното кино што е резултат на убавите реакции што ги имавме од публиката. Веднаш по вечерите на женски права продолжуваме со веќе традиционалната манифестација „Прозорец кон италијанскиот филм“, програма која содржи седум филмови, чија заедничка тема е миграцијата. И потоа продолжуваме со голем број други програми и фестивали кои ќе траат до почетокот на есента, нормално во зависност од временските прилики, но за разлика од минатата година, сега имаме и резервно решение и доколку врне, подготвени сме проекциите да ги одржиме во кино салата, нормално со придржување кон сите здравствени протоколи“, додава Ангелов. Свеченоста на доделувањето на наградите „Златен објектив“ чиишто добитници годинава се режисерот Коле Манев и филмскиот монтажер Спасе Тасевски ќе се одржи на 26 мај.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот