Оваа деценија ќе ја одреди иднината на климата на планетата Земја, гласи пораката која вчера ја упати американскиот претседател Џо Бајден за време на самитот на климата во Глазгов. Бајден рече дека климатските промени веќе го уништуваат светот и оти тоа веќе не е хипотетичка опасност, туку нешто што е видливо секој ден.

Домаќинот на самитот, британскиот премиер Борис Џонсон, пак, порача дека намалувањето на емисијата на стакленички гасови е деактивирање на темпирана бомба. Тој додаде дека самитот е „критичен“ момент и потенцираше дека евентуален амбициозен исход од него сè уште „лебди во воздух“.

Францускиот претседател Емануел Макрон ги повика најголемите светски загадувачи веднаш да почнат да ги исполнуваат своите обврски за намалување на емисиите на јаглерод.
Ова е само дел од пораките на светките лидери за тоа колку како и кога треба да се преземат мерки за спас на климата, која ги загрозува и богатите и сиромашните подеднакво. Но, богатите и сиромашните еднакво не се причинители на последиците, па оттаму и целиот овој проблем кој доминира во светот последниве децении.

САД, Велика Британија и Европската Унија ја поставија 2050 година како целна година за нулта нето стапка, што значи дека дотогаш треба да испуштаат само онолку стакленички гасови колку што можат да се апсорбираат од шумите, плантажите, почвата и технологијата за складирање јаглерод која се развива.

Кина и Саудиска Арабија ја поставија 2060 година како целна година, но критичарите велат дека тие цели се бесмислени доколку веднаш не се преземат конкретни мерки. Научниците велат дека треба да се преполоват глобалните емисии до 2030 година и да се достигне нулта нето стапка до 2050 година за да се спречат најлошите ефекти од климатските промени.

Сепак, се чини дека изјавите на светските лидери за тоа што треба да се направи не кореспондираат со она што се спроведува во пракса. И натаму најразвиените држави во светот се најголеми загадувачи поради нивните индустрии. Кина веќе најави дека со цел да ги задоволи своите огромни потреби ги активира ископите и технологиите на јаглен, а Германија и Франција најавуваат изградба на нови атомски централи.

Сето ова само ја потврдува изјавата на генералниот скеретар на ОН, Гутереш кој по самитот на Г20 кој се одржа во Рим и на кој се расправаше за климата кратко изјави дека не е задоволен од тоа како „големите“ се справуваат со заштитата на животната средина, но и како во перспектива на дело сето тоа ќе се спроведува.

– Наместо непромислена и деструктивна потрошувачка, потребна ни е свесна и промислена употреба, е нешто што барем во моментов не кореспондира со актуелниот капиталистички систем во кој денеска функционираат најразвиените држави во светот.