Денеска се навршуваат 24 години од почетокот на НАТО бомбардирањето на Сојузна Република Југославија (СРЈ), во кое, според проценките од различни извори, за 11 недели загинаа околу 2.500 цивили и околу 1.000 војници и полицајци.

Во бомбардирањето, кое траеше 78 дена, сериозно беа оштетени инфраструктурата, стопанските објекти, здравствените установи, медиумите, спомениците на културата и воените објекти.

Нападите врз Југославија започнаа на 24 март 1999 година, по наредба на тогашниот генерален секретар на НАТО, Хавиер Солана, а Владата на СРЈ истата вечер прогласи воена состојба. Акцијата на НАТО следеше по неуспешните преговори за решение на кризата во Косово во Рамбује и Париз во февруари и март 1999 година.

Бомбардирањето на Југославија заврши на 10 јуни, со усвојување на Резолуцијата 1244 на Советот за безбедност на ОН.

Еден ден претходно, претставниците на Југословенската армија (ВЈ) и НАТО го потпишаа Воено-техничкиот договор во Куманово, со кој беше прецизирано повлекувањето на силите на војската на Југославија од Косово и влегувањето на меѓународните воени трупи во покраината, што веќе се случи на 12 јуни.

Дваесет и четири години подоцна, сè уште трае спорот околу Косово. Приштина и Белград и натаму преговараат за нормализирање на односите но со цврсто подвлечени црвени линии. За Белград, Косово сè уште е нејзина јужна покраина,за Приштина и дел од меѓународната заедница, Косово е независна и држава, признаена од поглем дел од меѓународната заедница

Токму овој напад беше искористен и како еден од аргументите на Москва, чиј претседател Владимир Путин образложувајќи го покренувањето на руската воена инвазија врз Украина, се повика на примерот на НАТО воената кампања врз тогашна СРЈ.