Ако едвај чекате да патувате во вселената, НАСА ви нуди шанса да бидете дел од следната мисија додека агенцијата се подготвува да ги врати луѓето на Месечината, пишува „Usa Today“.

Оваа година, НАСА ќе ја лансира својата мисија „Артемида I“ во вселенскиот центар „Кенеди“ во Кејп Канаверал, Флорида, дел од заложбата на агенцијата „да изгради долгорочно човечко присуство на Месечината во децениите што доаѓаат“.

За да ја одбележи мисијата, НАСА ќе дозволи секој, бесплатно, да го стави своето име на флеш-драјвот што ќе се наоѓа на капсулата „Орион“.

Пријавувањето е едноставно. Прво, посетете ја веб-локацијата „Артемида I“ овде.

Откако ќе кликнете на копчето „Земи карта за патување“, треба да го пополните своето име и презиме, заедно со 4-7 цифрен пин-код. Откако ќе го поднесете формуларот, НАСА ќе испрати QR-код за да им овозможи на оние што ќе се пријават виртуелно да се приклучат на идните лансирања на НАСА. За да пристапат до нивната карта, корисниците треба да го запомнат својот пин-код.

„Се подготвуваме за Артемида I – и сакаме да ве земеме со нас“, напиша НАСА на „Твитер“.

We’re getting ready for #Artemis I — and we want to take you with us.

Add your name to the upcoming mission and it will be flown aboard the @NASA_Orion spacecraft as it orbits the Moon: https://t.co/DBmI3axfyH pic.twitter.com/KnoQaiyJcj

— NASA Artemis (@NASAArtemis) March 2, 2022

Не е одреден датум за лансирање, бидејќи НАСА го одложи поради безбедносни проверки. Агенцијата се надева дека ќе го лансира леталото во мај 2022 година.

Уникатната можност ќе дојде кога вселенското летало „Орион“ ќе биде лансирано како „најмоќната ракета на светот“ и ќе лета подалеку „од кое било кога било летало направено за луѓе“, велат од НАСА. „Орион“ ќе лета околу 100 киломентри над површината на Месечината околу шест дена, бидејќи леталото ќе помине околу еден месец во вселената.

Што сè е потребно за да преживеете нуклеарен напад?