Венгер: Се радував на поразот на Ливерпул
Поранешниот менаџер на Арсенал, изјави дека беше среќен кога Ливерпул го доживеа единствениот пораз досега во сезоната и нема да може да го повтори успехот на „топчиите“.
Венгер во сезоната 2003/04 со Арсенал триумфира во Премиер лигата на неверојатен начин – не доживеа ниту еден пораз од своите ривали, а Ливерпул во оваа сезона беше во серија од 27 натпревари без пораз пред да загуби од Вотфорд со 3:0 во февруари годинава.
– Да, тој пораз беше еден вид сатисфакција, секогаш сакаме да бидеме единствени кои имале такво достигнување. Ливерпул навистина можеше да оди до крајот, но тој пораз само покажува колку е тешко да се повтори нашиот подвиг. На денот кога загуби Ливерпул, добив многу пораки од навивачите на Арсенал – вели Венгер.
Венгер даде и свој коментар на актуелната состојба во која владее пандемијата на коронавирусот , тој смета дека натпреварите без навивачи не се идеални, но нема друг избор.
– Мислам дека натпреварите пред празни трибини е едно од најдобрите решенија во овие моменти, бидејќи одлуката за шампионот ќе биде донесена на теренот. Мора да им признаеме на Германците дека се многу храбри, продолжувањето на Бундеслигата е голема промоција за нивниот фудбал – додава Венгер.