Велика Британија формално ќе признае палестинска држава овој викенд, откако американскиот претседател Доналд Трамп, кој се противи на одлуката, ќе ја напушти земјата по државната посета, објави денес „Тајмс“  повикувајќи се на извори.

„Тајмс“ вели дека Велика Британија ќе објави одлука за признавање на државата Палестина откако Трамп ќе се врати во Вашингтон во четврток.

Британскиот премиер Кир Стармер претходно објави дека Велика Британија ќе ја признае државата Палестина на Генералното собрание на Обединетите нации следната недела, освен ако Израел не преземе суштински чекори за ублажување на ситуацијата во Газа.

Трамп во јули изјави дека нема да му пречи ако Велика Британија ја признае Палестина, по што САД се спротивставија на слични најави од други европски сојузници.

Трамп во моментов е  во официјална посета на Велика Британија, прва од овој мандат.

Трамп пристигна во Лондон во вторник вечерта кога изјави дека му се допаѓа што е назад во Велика Британија, која ја нарече „многу посебно место“, и дека кралот Чарлс е негов долгогодишен пријател кого многу го почитува, и дека поканата да дојде во замокот Виндзор е „исклучително голема чест“.

За време на посетата на Трамп, пред замокот Виндзор, каде што се одржува состанокот, беа организирани протест против Трамп и пропалестински протести.