Велешка конфекција ги прати вработените дома, син на шивачка позитивен на Ковид-19
Велешката конфекција Алена нема да работи до 4 мај, откако синот на една од шивачките добил позитивен резултат на Ковид 19. Веднаш се земени брисеви од целото семејство, а официјални резултати се чекаат. Конфекцијата има околу 360 вработени, за кои компанијата веднаш презела заштитни мерки, односно им било кажано да останат дома и да се самоизолираат.
-Уште веднаш кога дознавме дека детето на нашата вработена е позитивно на Ковид 19 не се работи, фабриката е празна. Официјално нема други позитивни случаи. Вработената е изолирана од 30 март, а фабриката нема да работи до 4 мај. Имаме околу 350/ 360 вработени и по препораките на Владата постапивме соодветно веднаш кога дознавме се јавивме во Институтот за јавно здравје. Жалосно е што затворивме, но моравме. Претходно, вработените наместо со два автобуси, ги распределивме во 4 автобуси, а дел доаѓаа на работа со комбе или со сопствени автомобили, поделивме маски и ракавици. Мораме да ги заштитиме и вработените и нас самите, изјави за Слободен печат шеф од едно од одделенијата на конфекцијата, Ангел Ристов.