Со ретроспективата на музички документарни филмови на македонскиот режисер Јане Алтипармаков на 4 јули и со филмовите „Сестри со транзистори“ и „Моби: Мобидок“ на 5 јули ќе се затвори осмото издание на филмскиот фестивал „Скопје синема сити“.

Фестивалот, кој беше отворен со изложба на фотографии од Ник Кејв на рок-фотографот Немања Ѓорѓевиќ (Србија) и филмот „Ник Кејв: 20.000 денови на земјата“ му оддаде почит на Кејв, кој е артист во фокус на фестивалот.

На 4 јули, во рамките на програмата на македонски автори и филмови, фестивалот ќе прикаже ретроспектива на филмови на Јане Алтипармаков: „Гето 103“, „Фолтин се јави“, „Бадмингтонс“ и „The Hip Overdrive“. Филмовите ќе бидат прикажани од личната архива на Алтипармаков.

Фестивалот се затвора со двата филма за електронска музика на 5 јули. „Сестри со транзистори“ ја раскажува историјата на електронската музика, но преку жените композиторки чии достигнувања биле од суштинска важност за овој жанр. Филмот е во нарација на Лори Андерсон. Фестивалот завршува со филм за Моби, каде на луциден начин е даден портрет на овој уметник и неговите успони и падови во една богата кариера.

Фестивалот „Скопје синема сити“ е во организација на здружението „Номад-Арт“ – Скопје. Автор на дизајнот на промотивните материјали е Дијана Димитриевска. Програмата на фестивалот е поддржана од Агенцијата за филм, Министерството за култура, Кинотека на Северна Македонија, Културно-информативниот центар (КИЦ), ПР агенција „Навигаторс“ и „Спона“ – центар за култура на Србите во Македонија.