Шефот на стручниот штаб Александар Васоски засега е задоволен од текот на подготовките според планираното. Екипата составена и од млади играчи, има мотив за работа, а на 17 јули екипата ќе замине во Словенија, каде ќе се одработуваат главниот дел од подготовките.

– Петти ден како се подготвуваме, и можам да истакнам задоволство од текот на подготовките. Во екипата имаме многу млади играчи кои се желни за докажување, а тука се и поискусните да им дадат поддршка на помладите. Имаме играчи кои за прв пат ќе искусат подготовки со сениорската екипа. Идната сезона ќе имаме млада екипа, со неколку искусни поединци и се надевам дека тоа ќе ни донесе добри резултати – рече Васоски.

Во моментов со екипата тренираат триесетина играчи, а стручниот штаб во наредните две недели ќе донесе одлука кои фудбалери ќе патуваат на подготовките во Словенија.

– На 17 јули треба да одиме во Словенија и таму да одиграме неколку пријателски натпревари. Во моментов имаме на располагање триесетина играчи, но во следните денови ќе одлучиме кои играчи ќе одат во Словенија на подготовки. Секако дека и во иднина будно ќе ја следиме ситуацијата во младите категории, и дека од таму ќе земаме уште играчи, за кои ќе сметаме дека имаат потенцијал и квалитет за во сениорскиот тим. Планираме пред замиувањето во Словенија да одиграме и една пријателска – додаде шефот на стручниот штаб.

Претходно објавивме дека еден од досегашните најдобри играчи во составот, Бразилецот Фелипе се поврзува со голем трансфер во Шкендија.