Портпаролката на Белата куќа Џен Псаки изјави дека администрацијата на претседателот Џо Бајден ги следи напорите на руските разузнавачки служби „насочени кон поткопување на вакцините против коронавирусот на компаниите Модерна и Фајзер“.

„Ние сме свесни за тоа, го следиме и преземаме чекори за негово решавање“, рече Псаки пред новинарите во понеделникот.

Според Ројтерс, таа посочила дека Соединетите држави со сите средства ќе се борат против дезинформациите.

„Секако дека сме запознаени со пристапот и тактиката на руските напори за дезинформација“, рече Псаки, додавајќи дека администрацијата на претседателот Бајден ќе повтори „во секоја можност“ дека вакцините се безбедни.

САД идентификуваа три публикации на Интернет во режија на руските разузнавачки служби, за кои тие тврдат дека се обидуваат да ги поткопаат вакцините против ковид-19 произведени од Фајзер и Модерна, рече Псаки во неделата.

Тие „ширеа многу видови дезинформации, вклучително и оние за вакцините Фајзер и Модерна, како и за меѓународните организации, воени конфликти, протести и какво било прашање на поделба што тие можат да го користат“, рече Псаки.

Портпарол на Кремлин го негираше американското тврдење дека Русија шири лажни информации за вакцините, додава Ројтерс.