Комесарот за соседска политика и преговори за проширување на Европската унија, Оливер Вархељ вели дека за Европската Комисија нема промена во ставот дека Република Северна Македонија и Албанија се подготвени да започнат преговори со ЕУ.

– Во претстојните месеци ќе имаме многу работа заедно со премиерот и другите лидери затоа што мора да дадеме нови предлози, нов пакет со кој ќе се унапреди процесот на проширување, рече Вархељ.

Според него, важно е да ги имплементираат реформите, а секако треба приоритет да е нов закон за Јавното Обвинителство.  Тој вели дека се надева дека тоа ќе се случи со сегашниот Парламент и дека тоа ќе е важен знак кон земјите членки на ЕУ.

– Подготвен сум да работам со било кој ја води владата. Комисијата нема да се меша во внатрешните работи на било која земја, а особено не на земји кандидати, изјави еврокомесарот.

Тој вели дека клучно е спроведувањето на Преспанскиот договор и билатералниот договор со Бугарија, без разлика која е владата.

– За крај и малку добри вести. Побарав од Европскиот парламент да објави награда од 50 милиони евра за постигнувањата и резултатите на земјата во искористувањето на европските фондови. Се надевам дека ќе добијам зелено светло и ќе се одобри исплатата, па ќе можете да ги искористите парите и да ги инвестирате во државата, рече Вархељ.