Ракометарите на Вардар вечерва (18:45 ч.) ги продолжуваат настапите во Лигата на шампионите, му гостуваат на тимот на Пик Сегед, противник против кој играа минатата недела.
На дуелот во Скопје, унгарскиот тим славеше со 26:28 и во „црвено-црниот“ табор се свесни дека вечерва ги очекува тежок предизвик. Вардарци ја признаваат фаворитската улога на Пик Сегед, но никако не одат со бело знаме во Сегедин.
– Анализиравме што треба да поправиме за овој натпревар, и во напад и во одбрана. Имаме мали проблеми со играчкиот кадар, Борко има повреда на коленото и речиси е отпишан за овој дуел. Меѓутоа, без секој се мора и се може. Ќе одиме на ова гостување без притисок, но не со бело знаме. Тие се фаворити, но ние не сме без шанси и ќе пробаме да се вратиме со позитивен резултат – вели тренерот на Вардар, Стевче Алушовски.

По седум одиграни натпревари во групата А во ЛШ, Вардар моменто се наоѓа на последното осмо место со една победа и едно реми, но има и најмалку одиграни натпревари од сите екипи во групата, додека Пик Сегед се наоѓа на петтото место со четири победи во девет натпревари.