Вардар во фантастична атмосфера го совлада Партизан за прва победа во СЕХА
Eкипата на Вардар стигна до прва победа во СЕХА лигата откако вечерва го совлада Партизан со 31:26.
Вардар важеше за фаворит пред почетокот на натпреварот и таа улога ја оправда и на теренот. Имаше неизвесност во натпреварот, но во клучните моменти Вардар го покажа квалитетот и дојде до победата.
Петкратниот шампион во ова натпреварување го покажа своето искуство, пред се во второто полувреме. Во првиот дел Вардар наметна темпо и во 19-тата минута водеше со 12:8, сепак со грешките во одраната и одличниот противнички голман Партизан успеа да се врати резултатски.
Партизан играше добро на стартот од вториот дел и со една серија од 4:1 стигнаа до изедначување 19:19. Неизвеноста ја одржуваа се до 42. минута. Стратегот на Вардар, Владо Недановски повика тајм-аут и вардарци повторно почнуваа да градат посериозна предност која не ја испуштија до крајот.
Манасков беше најефикасен со девет гола, Талески постигна седум колку што имаше и Стоилов. Одличен на голот беше и Мартин Томовски со 14 одбрани.
За пофалба беа и „Комитите“ кои како ретко кога на натпревар од СЕХА лигата беа во голема бројка и приредија фантастична атмосфера.