Ракометарите на Вардар 1961 го остварија и вториот триумф во рамките на македонската Супер Лига, откако во СЦ „Јане Сандански“ – Скопје со 30:21 го надиграа Бутел.

Само на стартот Бутел имаше позитива од 3:2, а потоа следеше серија од четири голови на „црвено-црните“. Оттогаш домаќинот беше константно во предност, на паузата замина со позитива од „плус четири“ (16:12).

Во второто полувреме се зголеми водството на актуелниот шампион, играчите на Владо Недановски имаа и шанса за двоцифрена разлика, на крајот застанаа на „плус девет“. По пет голови за Вардар 1961 постигнаа Чувара, Талески и Ќосевски, а истиот учинок на спротивната страна го имаше и Петрушевски.

По шест бодови во групата „А“ имаат Алкалоид, Вардар и Струга, по три Охрид и Бутел Скопје, а ниту еден Куманово, Прилеп и Вардар Неготино.

Три дена по освојувањето на Суперкупот на Македонија во Охрид, играчите на Еурофарм Пелистер се вратија на терен и запишаа нова победа. Во последниот натпревар од второто коло на групата „Б“ на Суперлигата, во Битола беше совладан Голден Арт со 32:25 (14:14).

Хосни за Е. Пелистер во салата „Боро Чурлевски“ беше најефикасен во со девет голови, а за Голден Арт по пет погодоци имаа Шилегов и Рајатовски. Во групата „Б“ првото место го делат Е. Пелистер и Т. Пролет со по шест бодови, следуваат Тиквеш, Е. Пелистер 2 и Скопје 2020 со по три, по еден бод, Јуниор КВ и Радовиш, а ниту еден Голден Арт.