Вардар без Ристовски и без Гаџа на мегдан против Кил
Ракометарите на Вардар вечерва (20.45 часот) му гостува на Кил во рамки на деветтото коло од Лигата на шампионите.
„Црвено-црните“ се наоѓаат во серија од пет порази по ред во Лигата на шампионите, а за вечерашниот натпревар, тренерот Веселин Вујовиќ нема да може да смета на голманот Борко Ристовски кој се уште не е опоравен од повредата како и средниот бек, Анте Гаџа кој има вироза. На нивното место, во тимот се Али Сафар како и Јоел Куни Моралес кој го пропушти последниот натпревар за Вардар во ЛШ.
– Нè очекуваат три многу важни натпревари, првиот е во Кил каде што секако не сме фаворити, ниту една екипа во Европа не е фаворит во Кил. Би било многу важно за нас да одиграме еден добар натпревар, бидејќи тоа би било значајна мотивација за мечот во Загреб (8 декември) и дуелот во Битола против Еурофарм Пелистер (18 декември). Што се однесува до составот, имаме проблем, Гаџа доби вироза и единствениот среден бек, класичен кој го имаме, нема да патува со нас, тоа ми прави многу проблеми. Се враќа Куни Моралес, иако не е 100% подготвен, но сепак да биде во контакт со самиот амбиент, за да не направи преголема пауза – вели тренерот Вујовиќ.
Првиот меѓусебен натпревар сезонава кој се играше во Скопје заврши со триумф на германскиот тим од 26:20.