Ван Бастен: Подобар сум од Вернер барем 18 пати
Поранешниот холандски репрезентативец Марко ван Бастен, нема позитивно мислење за квалитетите на напаѓачот на Челси, Тимо Вернер.
Ван Бастен кој е еден од најдобрите напаѓачи на сите времиња, смета дека Вернер не е фудбалер за големи клубови.
– Барем 18 пати сум подобар од него. Тој не може да биде напаѓач од светска класа и не треба да игра за толку голем клуб каков што е Челси – вели Ван Бастен.
Тимо Вернер минатото лето од Лајпциг се пресели на „Стемфорд бриџ“, но не ги оправда очекувањата и се „прослави“ со неверојатните промашувања, од кои едно беше и против фудбалската репрезентација на Македонија во квалификациите за СП 2022 година кога промаши празен гол од пет метри.
Минатата сезона, Тимо Вернер постигна вкупно 12 гола во сите натпреварувања.
Марко ван Бастен во својата кариера настапуваше за Ајакс и за Милан, а со репрезентацијата на Холандија во 1988 година триумфира на Европското првенство.
