Министерот за здравство Венко Филипче денеска соопшти дека веројатно во среда ќе почне вакцинацијата, а утре на скопскиот аеродром околу 14 часот треба да пристигне првата пратка.

Според Филипче, од кинеската вакцина се очекуваат 200.000 дози од кои одредена количина може да дојде за кратко време, но сѐ уште нема потврда кога.

Од руската вакцина „Спутник V” се очекуваат 200.000 дози, а со оние од „Астра Зенека” вкупно 2.200.000 вакцини треба да стигнат во Македонија.

– Многу веројатно дека во среда ќе почне вакцинацијата, а вакцината утре треба да пристигне на скопскиот аеродром околу 14 часот. Ги добивме од руската компанија сите потребни документи за да се подготви административната процедура во Агенцијата за лекови, што значи увозна дозвола и сега во текот на викендот и непосредно по доаѓањето и дозволата да се стави во употреба – информира министерот.

Во врска со кинеската вакцина Филипче објасни дека се завршени сите потребни административни работи.

– Ги завршивме сите потребни административни работи, размената на документите и сме во комуникација. Очекуваме тајминг за нивното доаѓање – рече тој.