Српскиот филм „Дара од Јасеновац“ ги потресе луѓето од регионот кои по прикажувањето на филмот не престануваат да ги коментираат потресните сцени, а публиката е потресена од злоделата на жената со небеско сини очи.

„Дара од Јасеновац“, кој исто како и нашиот филм „Врба“ испадна од трката за Оскар е историска драма на режисерот Гага Антонијевиќ и го прикажува секојдневниот живот во концентрациониот логор од аголот на 10-годишното девојче Дара Илиќ, која била уапсена со постариот брат, мајка ѝ и двегодишниот брат на Козара. Нејзиниот татко веќе бил затворен во Јасеновац и работел како гробар, знаејќи дека еден ден и самиот себеси ќе си ископа гроб.

Непосредно пред доаѓањето во женскиот и детскиот дел од логорот Стара Градишка, мајката на Дара и нејзиниот постар брат биле убиени. После тоа приказната се фокусира на одлучноста на Дара да го одржи ветувањето што ѝ го дала на мајка си: дека никогаш нема да се одвои од малото братче, дури и кога тој ќе станува сѐ послаб и кога жените што се грижеле за него во логорот ќе бидат убиени или однесени во Германија на принудна работа.

Логорот, основан на почетокот на јули 1942 година бил под управа на калуѓерките од конгрегацијата „Св. Винко Паулски“. Во него се сместувале бебиња од шест месеци па сѐ до деца до 14 години. Условите во кои престојувале децата биле катастрофални, а многу калуѓерки чувари на логорот се истакнувале во злоставувањето и драстично ги казнувале децата за секој престап. А пред ужасната тортура децата во логорот стигнувале болни, изнемоштени и скоро голи. Децата боледувале од најмалку една тешка болест, а многу имале истовремено и повеќе болести, дизентерија, тифус, скорбут, воспаление на белите дробови и дифтерија. Поради болестите, изгладнетоста и начинот на „воспитување“, дневно умирале по неколку момчиња и девојчиња. Починатите дечиња ги закопувале по десетина заедно во местото Јастребарско, пишува српски Новости.

Како убивала Барта

– Методот на убивање на децата од 3 до 10 години изгледал вака. Прашувале: „Деца, кој сака да ги види мама и тато?“ или „Деца, кој сака чоколадо?“ Децата би се јавувале: „Јас, јас, јас“. Тогаш ги носеле до јамата и со удар со чекан по главата ги фрлале во неа“ – раскажал своевремено за „Политика“ Гојко Рончевиќ, кој како седумгодишник три месеци бил во Јастребарско. Пред него сестрата Барта убила две деца.

Како што сведочи Зорка Делиќ, една од преживеаните, а пренесува Новости.рс, сестра Барта на сите им зборувала дека се бандитски деца и дека треба да бидат убиени. Сестрите ги тепале со прачки, а после на отворените рани им истурале оцет или солена вода.

Барта Пулхерија, 60-годишна калуѓерка, посебно била озлогласена по своите постапки кон децата, а била управителка на логорот.

Според информациите достапни на интернет, се наведува дека сестрата Барта по војната емигрирала во Австрија.

На Википедија се наведува дека во логорот биле заробени 3.336 деца, а до крајот на октомври 1942 година, умреле најмалку 449 деца.

ГАЛЕРИЈА: Погледнете како изгледале постерите против Евреите во нацистичка Хрватска

ФОТО+ВИДЕО | 75 години од пробојот на логорашите во „фабриката на смртта“ Јасеновац