Утринава од 6 часот почнал протестот на грчките камионџии на граничниот премин Евзони, за да се испрати порака до тамошната влада и да се деблокираат транпортните коридори. Биљана Муратовска од Макам транс за „Слободен печат“ вели дека таму била и нивна делегација, која се придружила на блокадата која траела до 10 часот. Поддршка стаса и Здружението АМЕРИТ. Деновиве од грчка страна е минимално зголемен бројот на дозволи за влез на камиони, но тоа не е доволно за нормален проток. До минатата недела камионскиот транспорт беше изземен од тестови и транспортот на Коридорот 10 се одвиваше без застои, потсетува Муратовска.

– Транпортните здруженија се солидарни во ваква ситуација и се придруживме на барањата на грчките колеги, граничниот премин Богородица-Евзони да биде отворен 24 часа. И тие и ние не сме против правењето ПЦР тестови, но грчките власти мора да обезбедат повеќе здравствени екипи за да нема застои. Се бориме и за еднаков третман, бидејќи на границата меѓу Грција и Бугарија (Промахонес), се работи 24 часа и ПЦР тестовите се прават по случаен избор, додава Муратовска.

Застоите на граничниот премин Богородица- Евзони, кој е единствен отворен за влез и излез од Грција, ги алармираа и тамошните бизнисмени, кои трпат сериозни штети од блокадите.

– Грчките нафтени компании се сериозно загрижени од ваквиот развој на ситуацијата, бидејќи Македонија одтаму набавува гориво. Да не зборуваме за транспортот на стоки за широка потрошувачка, суровини за хемиска индустрија и црната и обоената металургија, објаснува Муратовска.