Изминатата недела беше бурно во Собранието, со многу препукувања, но и блокирања на одредени закони. Седницата закажана во вторникот беше одложена, а до почетокот на кампањата за локалните избори има само уште неколку дена. На теми поврзани со работата на Собранието во Утрински брифинг разговаравме со Дафина Стојановска, пратеничка од ВМРО-ДПМНЕ.

Според информациите што пратеничката ги добила од Собранието, ќе нема можност да се одржи седница пред почетокот на кампањата за локалните избори, но ќе работи комисијата за образование.

-Собранието е бурно и минатиот и овој мандат. Овој хаос би го насочила кон мнозинството, не знам дали вината е во тенкото мнозинство на власта, а не е добро да ја користат пандемијата како изговор ниту вината да ја префрлаат на опозицијата, вели Стојановска за Утрински брифинг.

Министерката за труд и социјална политика Јагода Шахпаска во денешното гостување во Утрински брифинг рече дека Законот за недела да биде неработен ден е блокиран од пратеничката група на ВМРО-ДПМНЕ која претседава со соодветната комисија.

-Според деловник пратениците користат одмор, а законот е поднесен во време на одморот. Ние не го блокираме законот, но никој не предвиде дека ќе се случи трагедијата во Тетово, а ние баравме информација од министерката за делот од нејзината работа односно каде е вината во поглед на она што се случи на 8 септември. Ние не сме против законот, но јавноста треба да знае дека има преку 40 исклучоци, значи не ги опфаќа сите. Ако имаа чесни намери имаа време за расправа по законот. Но по 8 септември сакавме отчет за модуларните болници, вели Стојановска за Утрински брифинг.

Таа се пожали дека нивните амандмани се одбиени, оти го пишувале името на државата онака како што го пишувале.

-Нашиот став е јасен, тоа име може да се користи во меѓународни документи, а ние и друг пат сме го пишувале вака, вели Стојановска.

Пратеничката група на ВМРО-ДПМНЕ отвори дебата во Собранието со став дека Собранието треба да го разреши министерот за здравство Венко Филипче. Стојановска вели дека оставката што министерот ја поднесе од морални причини до премиерот Зоран Заев се уште не е донесена во Собранието, а досега требало да биде донесена.

-Ние не блокираме го кажуваме нашиот глас, го пренесуваме она што доаѓа од народот, кој не само што изумира туку и нема пари да преживее. Очекувам мнозинството во парламентот по изборите да добие друга димензија, односно дека власта ќе го загуби мнозинството, вели Стојановска за Утрински брифинг.