Се ближи почетокот на новата грејната сезона која е можно да почне и порано ако температурите паднат на  12 степени или пониско. Во тој случај БЕГ има обврска да почне со испорака на топлинска енергија и пред 15 октомври.

-Испораката на топлинска енергија може да почне и на 1 октомври ако температурата е 12 или под 12 степени. Во тек се редовните проверки на потстаниците, а се прават и последни подготовки за остранување на проблеми во мрежата, вели за Утрински брифинг Емилија Јакимовска Мишева, лицето за односи со јавност во БЕГ.

За да може навремено да почне испораката на топлинска енергија потрошувачите и заедниците на сопственици треба да ги завршат интервенциите на внатрешната грејна инсталација, да овозможат непречен пристап и напојување со електрична енергија на топлинската станица за таа да биде функционална.

Во домовите одржувањето на внатрешната грејна инсталација е обврска на сопствениците и заедницата на станари.

-Во околу 380 станбени објекти во моментов има дефекти во внатрешната инсталација, или нема пристап или електрична енергија во потстаниците за што БЕГ ги извести станарите за нивната обврска, вели Јакимовска Мишева за Утрински брифинг.

По завршувањето на интервенциите на внатрешната инсталација или потстаницата, потрошувачите треба да се јават во Центарот за грижа на потрошувачи на БЕГ и да известат. На веб страницата на компанијата има информација кои објекти се затворени и зошто не може да се испорача топлинска енергија.