Уставниот суд ја одржа првата седница во минимален состав од петмина судии
Уставниот суд денеска ја одржа првата седница за 2022 година, во минималниот состав од петмина судии.
Како што е објавено на веб-страницата на Судот, уставните судии денеска не повеле постапка за оценување на уставноста на член 19 став 17 од Законот за административни службеници.
Судиите неповеле постапка за оценување на уставноста и законитоста на Одлуката бр.09-360/1 од 31.01.2020 година на Советот на Општина Кочани и Одлуката бр.09-317/1 од 28.01.2021 година на Советот на Општина Кочани и ја отфрлил иницијативата во делот со кој се бара оцена на меѓусебната согласност на оспорените одлуки со Уредбата за определување и реонизација на зони на градовите и населените места, Правилникот за стандарди и нормативи за урбанистичко планирање и со Методологијата за процена за пазарната вредност на недвижен имот.
На седницата била отфрлена иницијативата за оценување на уставноста и законитоста на член 1 став 2 од Гранскиот колективен договор за изменување и дополнување на Гранскиот колективен договор за органи на државната управа, стручните служби на Владата на РСМ, судовите, јавните обвинителства, казнено-поправните и воспитно-поправните установи, државното правобранителство, општините, Градот Скопје и општините на Градот Скопје, агенциите, фондовите и другите органи основани од Собранието на Република Северна Македонија.
Предлогот на судијата-известител за поведување постапка за оценување на уставноста на член 174 ставови 8 и 9 и член 176 став 3 од Законот за високото образование („Службен весник на Република Македонија” бр.82/2018), не го добил потребното мнозинство гласови и за овој предмет, како што е наведено во соопштението, ќе се одлучува на некоја од наредните седници на Судот.