Успешен старт на „граѓаните“, Астон Вила го казни Шефилд! (ВИДЕО)
Денеска се одиграа уште два натпревари од второто коло во Премиер лигата, Астон Вила минимално триумфираше над Шефилд јунајтед, а Манчестер сити ја оправда фаворитската улога на гостувањето кај Вулверхемптон.
„Граѓаните“ предводени од шпанскиот менаџер Пеп Гвардиола беа подобри од Вулвси со резултат 1:3, водство донесе Де Брујне од пенал во 20 минута од средбата.
Во 32 минута Стерлинг правовремено асистираше до Фоден за зголемување на предноста. Домаќините во вториот дел намалија преку Хименез, а конечниот епилог го постави Габриел Жезус во самиот финиш од средбата.
Астон Вила со 1:0 беше подобра од Шефилд јунајтед, гостите уште во 12 минута останаа со еден играч помалку поради црвениот картон на Еган. Екипата на менаџерот Вајлдер имаше дури шанса да стекне предност, но пенал не реализираше Лундстрам во 34 минута.
Казни противникот во 63 минута, Мингс скоро без гледање, случајно асистираше до Конса кој успеа да ја затресе мрежата на Ремсдејл.
Во наредното коло на 27 септември Шефилд на домашен терен ќе ги одмери силите против Лидс на македонскиот репрезентативец Езџан Алиоски.