Уште малку остана до отворањето на Дино паркот
Дино паркот во рамки на скопката зоолошка градина е готов, и истиот наскоро ќе ги пречека првите посетители.
Од зоолошката градина најавуваат дека наскоро е големото отворање на новиот Дино парк.
– Конечно и кај нас, наскоро отворање на новиот Дино Парк во Зоолошката Градина во Скопје. За сите оние кои сакаат да се впуштат во нови и возбудливи авантури, да дознаат за неверојатниот свет на диносаурусите и да се сретнат очи во очи со застрашувачкиот T-Rex, големиот но мирољубив Трицератопс и многу други, стои во објавата на Фејсбук страната на Град Скопје.
Паркот зафаќа површина од 2.000 метри квадратни. Има два влеза, еден од внатрешноста на Зоолошката градина и уште еден од страната на Градскиот парк. Во паркот ќе бидат изведени сите придружни елементи односно патеки, зеленило, билетарница, тераса и дел за одмор.
Во паркот има 41 динасаурус во природна големина. Посетителите во природна големина ќе можат да видат Тираносаурус, Стегосаурус, Алосаурус како и поставки со мали диносауруси. Диносаурусите ќе имаат синхронизирани движења, дишење, трепкање и ќе испуштаат звуци, со што ќе ги доловиме на посетителите овие праисториски животни. Ова ќе биде прв Дино парк на Балканот каде ќе има толкав број на диносауруси, како и едукативна содржина за секој од нив.
За Дино паркот ќе се наплатува посебен билет од 50 денари, без разлика дали веќе сте посетител на Зоолошката градина.
За уредување на просторот и набавка на диносаурусите од буџетот на Град Скопје обезбедени се 20 милиони денари (околу 325.000 евра).