Уредникот на „КРИК“ на „црна листа“: Му ги скенирале зениците и го депортирале во Србија
Уредникот на „КРИК“, Стеван Дојчиновиќ, за Н1 изјавил дека, освен што е ставен на „црната листа“, тој не добил друго објаснување зошто не му било дозволено да влезе во Обединетите Арапски Емирати (ОАЕ).
Дојчиновиќ е приведен на аеродромот во Абу Даби, каде требало да говори на конференцијата на Обединетите нации за дрога и криминал, а потоа е депортиран назад во Србија.
-Синоќа, кога слетав на аеродромот во Абу Даби, околу 20 часот, веднаш штом го предадов пасошот на граничниот службеник, по неговиот изразна лицето видов дека видел нешто во компјутерот што не е во ред- рече Дојчиновиќ.
Тој вели дека потоа бил однесен во одделот за имиграција, а потоа и во делот на аеродромот каде се наоѓа полицијата.
-Ме чуваа таму следните 12 часа, сè до утрото кога ме испратија назад во Србија- вели тој.
Дојчиновиќ вели дека се обидувал да комуницира со нив, но не му соопштувале никакви информации.
-Ми зедоа отпечатоци од прстите, ми ги скенираа зениците… Преку комуникација со нив, дознав дека сум на некоја „ црна листа“, но не од нив, туку од друга влада- вели Дојчиновиќ.
Тој се потсетил дека му бил забранет влез во Русија во 2015 година, па можно е Русија да го ставила на таа листа.