Унгарија потпиша нов договор за снабдување со гас од Русија, заобиколувајќи ја Украина
Будимпешта потпиша нов долгорочен договор во понеделникот со рускиот енергетски гигант Гаспром за испорака на гас заобиколувајќи ја Украина, пренесува Ројтерс.
Договорот го потпишаа извршниот директор на „Газпром“, Алексеј Милер и директорите на унгарската енергетска група „МВМ“ во Министерството за надворешни работи на Унгарија.
Договорот беше потпишан откако унгарскиот министер за надворешни работи Петер Сијарто минатиот месец објави дека Будимпешта се договорила со Москва за сите услови за нов договор за снабдување да стапи на сила од 1 октомври. Министерот рече дека според новиот договор, Унгарија ќе купи гас „за многу подобра цена отколку што беше цената која беше според договорот што истекува“, потпишан во 2020 година.
Договорот предвидува испорака на 4,5 милијарди кубни метри гас годишно во Унгарија во следните 15 години: 3,5 милијарди кубни метри гас ќе течат низ Србија и една милијарда преку Австрија. Договорот ќе важи 15 години, со можност за промена на условите по 10 години.
Реакцијата на Киев на потпишувањето на договорот беше брза. Генералниот директор на украинскиот систем за транспорт на гас, Сергеј Микогон, изрази стравување дека со овој договор, Будимпешта практично целосно ќе го прекине транзитот на гас преку Украина.
Шефот на дипломатијата на Унгарија му порача на Киев да не се меша во внатрешните работи на неговата земја.
– Протестирам против овој обид за мешање во внатрешните работи на Унгарија и снабдување со гориво во зимскиот период, рече Сијарто, коментирајќи ги изјавите на украинските претставници по повод потпишувањето на гореспоменатиот договор.
Тој додаде дека ниту една држава не може да влијае врз одлуките кои ги носи Унгарија.