Францускиот дефанзивец Самуел Умтити сака да го раскине договорот со Барселона за да може како слободен играч во зимскиот преоден рок да си најде нов клуб.

Тренерот на Барселона, Роналд Куман, јасно му стави до знаење на Умтити дека не смета на неговите услуги по што дефанзивецот побара состанок со управата надевајќи се дека ќе му озвоможи уште во јануари идната година да си замине од „Камп Ноу“.

Се очекува, управата на чело со претседателот Жоан Лапорта да му дозволи на Умтити да си замине во јануари бидејќи екипата се наоѓа во голема финансиска криза и сака да се реши од сите фудбалери кои имаат големи плати, а не се во прв план како што е случај со Умтити.

Челниците на Барселона уште во летниот преоден рок му нудеа на Умтити да си замине од Барселона, дури беа подготвени да го пуштат без обесштетување, само за да го растеретат буџетот за плати и да потпишат нов договор со Лионел Меси. Но Умтити тогаш велеше дека сака да остане на „Камп Ноу“ и да се бори за место во првиот тим. Згора на тоа, одби да му биде намалена платата за оваа сезона.

Доколку добие зелено светло да си замине, следна дестинација на Умтити се очекува да биде Серија А од каде сериозен интерес за неговите услови пројавуваат Милан и Јувентус.