Уметници и волонтери учествуваат во еколошкиот проект „Заедно дишеме“
Во тек е четиридневната уметничка работилница за креирање „лендарт“ покрај автопатот Скопје – Велес, близу железничката станица „Рајко Жинзифов“, во месноста Лавчани. Настанот трае од 5 до 8 август и е дел од проектот „Заедно дишеме“ на уметницата Симона Манчева.
„Лендарт“ е движење што се јавува во 60-тите и 70-тите години преку креирање уметнички дела со природни материјали на отворен простор. Целта на проектот е преиспитување на начините на кои ѝ пристапуваме на природата, подигнување на свеста за екологијата и активно делување на заедницата во решавање на проблеми на микро ниво. Во партиципативниот проект, уметници и волонтери од Скопје, Велес, Неготино и Кавадарци создаваат инсталации со природни материјали и со рециклирање на отпадна хартија.
Учествуваат уметниците Симона Манчева, Ана Трајковска, Ристо Јосифовски – Ромбо, Доротеј Нешовски, Елена Димова Пантелиќ и Славица Капиданова, како и волонтерите Уна Стошиќ, Викторија Чочева, Верица Чочева и Дарко Стојанов.
Настанот има и интерактивна работилница за пермакултура, со правење семенски бомби. Реализатор е Елена Данова, едукаторка со искуство во областа на пермакултурата и едукативното градинарство.
Проектот „Заедно дишеме“ содржи три етапи. Првата опфаќа размена на искуства, каде уметниците и екологистите прават инсталации од природни материјали. Иако е време на дигитални медиуми и комуникација, сѐ уште се сечат многу дрвја за производството на хартија.
Заради тоа, втората фаза опфаќа работилници за рециклирање на хартија, предводени од Ана Трајковска и Драганчо Таневски, а во соработка со ЈП „Комуналец“ и одделението за хортикултура на општина Кавадарци.
Третата етапа е во соработка со Македонски шуми – „Бор“ – Кавадарци и планинарскиот клуб ЗПК „Зелен брег“ – Кавадарци. Нејзина цел е подигнување на свеста за климатските промени што дополнително се влошени од шумските пожари.
Настанот е реализиран во соработка со КСП „Центар-Јадро“, и е дел од проектот „Места на дарежливост – трансформативни станици“, финансиран од Фондацијата Отворено општество – Македонија. (Е.П.)
(Текстот е објавен во „Културен печат“ број 140, во печатеното издание на весникот „Слободен печат“ на 6-7 август 2022)