Уметничката инсталација „Сенките на занаетите“ ќе биде презентирана во КСП „Центар-Јадро“
Во рамки на седмото издание на фестивалот „Крик“ на 30 јуни, со почеток во 20 часот, во КСП „Центар-Јадро“ ќе биде заокружено тринеделното комплексно мапирање на занаетите во Скопје, под водство на Билал Јулмаз и Лидија Хаѕионау, со изложбата „Сенки на занаетите – инсталација на сенка – светло – звук“.
„Сенки на занаетите – Скопје“ е резултат на партиципативно истражување за занаетчиската култура во Скопје, реализирано за време на едномесечениот престој на уметникот Билал Јулмаз и кураторката Лидија Хаѕиоану во рамките на „Крик“ – фестивал за критичка култура, заедно со учество на локални креативци.
Во контекст на нивниот проект „Creative – Craft Platform“ (Креативна платформа за занаети), Билал Јилмаз и Лидија Хаѕиоану имаат цел да воспостават мрежи и заедници на занаети и креативци во контекст на предизвиците кои ги носи со себе постиндустриското општество. Проектот нуди алатки за воспоставување колективна архива на занаетчиската култура и активирање на креативците да размислуваат за потенцијалот на занаетчиството, притоа документирајќи и разбирајќи ги аспектите на трансформацијата на занаетчиството во современиот контекст.
Скопје е првиот град кој е мапиран надвор од Турција, по Истанбул и Ајвалик. Партиципативното истражување реализирано во изминатите неколку недели е претставено на интерактивна дигитална мапа. Тоа е првиот чекор кон формирање на локална заедница на креативци и занаети, која ќе стане дел од динамична меѓународна мрежа на мапирани градови. Инсталацијата го визуелизира процесот на мапирање и истражување, преку предмети и звуци кои го претставуваат занаетчискиот пејзаж на градот.
Уметникот Билал Јилмаз и кураторката Лидија Хаѕиоану се занимаваат со занаетчиството и неговата повеќеслојна врска со уметноста, наследството, индустријата, технологијата, родовата динамика, продукцијата и потрошувачкото општество. Заедно, тие ја развиваат платформата „Creative-Craft“, дигитална алатка и физички концепт за мапирање – поврзување -реактивирање и редефинирање на современото значење на занаетчиството, со цел да го откријат нивниот културен, економски и одржлив потенцијал за производство на креативни идеи во постиндустриската ера.