УЈП подготви три кривични пријави за фирми поврзани со „Рекет“
Станува збор за невладината организација Меѓународен сојуз, за Томато продукција и БЈМ медиа Груп.
УЈП подготвила три кривични пријави за фирми кои се поврзани со случајот „Рекет“ и кои треба наскоро да бидат процесуирани. Станува збор за невладината организација Меѓународен сојуз, за Томато продукција и БЈМ медиа Груп, која ја основаше 1ТВ и чиј сопственик е таткото на Бојан Јовановски-Боки 13, Миле Јовановски.
Од УЈП не откриваат повеќе детали, но во интервјуто за „Слободен печат“ директорката Сања Лукаревска потенцираше дека Управата не е нем набљудувач во врска со случајот „Рекет“ и тие самостојно започнале со контроли на компаниите кои се поврзани со Боки 13. Тогаш директорката изјави дека Управата имала намера, сите сомнителните наоди да им се предадат на обвинителите, како што и ќе се случи наскоро.
Од Управата на денешната неформална средба со новинарите посочија дека наскоро ќе започнат со засилени контроли во повеќе услужни дејности, со цел да се стопира „сивата економија“, како и нелојалната конкуренција, но засега не сакаа да откријат за што точно станува збор.