УЈП ги опоменува фирмите за февруарските плати: Над 11.750 работодавачи го промашија рокот
Управата за јавни приходи, почна да испраќа опомени за неисплатени феруарски плати до фирмите, а тоа се совпаѓа со периодот на доцнење на државната помош од Петтиот пакет. До 23 март, вкупно 11.758 работодавачи, не ја исплатиле февруарската плата стои во информацијата која „Слободен печат“ ја доби од УЈП.
-Согласно евиденцијата на УЈП со состојба од 23 март, бројот на неплатени пресметки по основ на МПИН за месец 02/2021, има вкупно 11.758 работодавачи, кои во законскиот предвидениот рок не го платиле доспеаниот долг по основ на платата. Работодавачите кои не го исплатиле својот долг по основ на МПИН за февруари во законски предвидениот рок, односно до 15 ти март 2021 година , од страна на УЈП се генерирани опомени и се во тек на достава до должниците – информираат од УЈП.
„Слободен печат“ ја провери информацијата на терен и дел од фирмите ни потврдија дека добиле опомени дека треба да ги исплатат платите на вработените, а наскоро може да им следуваат и блокади на сметките.
-Не оставија на цедило, а тие си тераат политика. Најбезобразно е тоа што слушаме и дека граѓаните можат да издржат без пари – велат од една мала компанија.
Од бизнис заедицата веќе неколку дена стигнуваат жестоки критики за неодговорноста и несериозноста на пратениците.
-На бизнисот му треба помош сега и веднаш. А пратениците треба ги претставуваат оние што ги бирале, што тоа значи дека треба што поскоро да ги надминат партиските интереси – рече за „Слободен печат“, Ангел Димитров, претседател на Организацијата на работодавачи на Македонија.