УХМР: Променливо облачно и ветровито време со температури од -2 до 13 степени
Времето денеска ќе биде променливо облачно, ветровито и студено, со услови за провејување на слаб снег на планините и наместа со слаб дожд во југозападните делови во земјата. Попладне ќе биде посончево. Ќе дува засилен, во источните делови и вдолж Повардарието и силен, северозападен ветар кој на места ќе достигнува брзина и над 60 км/час.
Утринската температура ќе се движи од -2 до 6 степени, а дневната од 3 до 13 степени.
Во Скопје слично време со засилен ветар од северозападен правец. Утринската температура ќе се спушти до 3 степени, а дневната ќе достигне до 10 степени.
Во следните денови ќе преовладува променливо облачно и студено време со сончеви периоди, а на планините повремено ќе провејува снег. Утринските температури во четврток и во петок во најголем дел од земјава ќе бидат под нулата. Нов влажен бран со врнежи од дожд се очекува од сабота попладне.