Угостителите на гости кај гувернерката: Може да сметаат на поддршката од банките

Гувернерката Анита Ангеловска-Бежоска и дел од тимот на Народната банка денеска одржаа конструктивна работна средба со претставници на Независната угостителска комора (НУК), на која учествуваа и претставници од банкарскиот сектор, информираат од Народната банка.

На состанокот, гувернерката истакнала дека Народната банка со внимание ги следи движењата во економијата и во одделните сектори, вклучително и во угостителската дејност. Таа потсетила дека на почетокот на здравствената криза, Народната банка презеде регулаторни мерки со кои се обезбеди поголема флексибилност во начинот на кој банките може да им ги олеснат кредитните услови на кредитокорисниците со цел да се намали нивниот финансиски товар во услови на отежнато работење поради пандемијата.

– Како што беше истакнато, овие, како и другите мерки преземени од страна Народната банка придонесоа и за задржување на стабилноста на банките, но и за зајакнување на нивниот капацитетот за кредитна поддршка на стопанството, што се потврдува со солидниот кредитен раст остварен минатата година, рекла Ангеловска-Бежоска.

Претставниците на НУК на средбата ги изложиле предизвиците со кои се соочуваат компаниите од угостителскиот сектор при финансирањето на нивните секојдневни активности, а имајќи ги предвид и ограничувањата во нивното работење заради мерките за спречување на ширењето на корона-вирусот.

Како што посочијале, забраните и ограничувањата на работното време, како и посебните препораки и протоколи за работа, кај угостителите имаат ефект на намалување на приходите, што влијае врз нивната подготвеност за навремено и целосно намирување на нивните обврски, вклучително и инвестициските.

На состанокот било заклучено дека во постојната законска регулатива не постојат пречки за банките за обезбедување реструктурирање на обврските на нивните клиенти. Од претставниците на банките, присутни на средбата, било истакнато дека угостителскиот сектор и натаму може да смета на поддршката од банките во надминувањето на последиците од корона-кризата и дека дел од банките веќе преземаат активности со кои се доаѓа до најсоодветните можности за нивните клиенти од овој сектор.

– Во завршницата на работната средба беше заклучено дека иницијативата на НУК најде одзив кај Народната банка и банките, при што засега ќе се продолжи со преземањето активности на индивидуално ниво од страна на банките кон клиентите од угостителскиот сектор. На предлог на тимот на Народната банка, НУК ќе продолжи со директна комуникација со банките, а во случај на потреба, заеднички ќе организираат дополнителни средби и помеѓу банките, Комората и угостителите, заради изнаоѓање натамошни решенија за финансиска кредитна поддршка во интерес на двете страни, велат од Народната банка.

Оттаму додаваат дека во зависност од натамошниот развој на настаните, доколку постои потреба ќе се разгледа и можноста за дополнителни мерки и активности коишто ќе овозможат надминување на привремените отежнати услови на работење на најпогодените сектори.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот