Директорот на ДПИ Стојко Пауновски, на денешната прес-конференција потенцираше дека ќе има казни за сите угостители кои нема да се придржуваат кон протоколите.

-На вчерашната прес-конференција ги истакнавме протоколите за угостителите и тоа беше во насока за првите 10 дена инспекторите да помогнат за нивна примена. Но, на терен утврдивме дека угостителите се однесуваат како во времето пред пандемијата. Крајно разочарувачки е она што го видовме. Свеста на граѓаните и на угостителите е на крајно ниско ниво. Затекнавме жива музика, качени гости на маси, прегрнати. Кога инспекторите ќе влезеа во локалите, газдите им викаа едуцирајте нѐ и напуштете го објектот. Не се почитуваат сите точки од протоколот, не само некои. Совеста затаи и затоа најавувам дека од денес секој ден и во сабота и недела, од утро до вечер ќе бидеме на терен и ќе казнуваме – рече Пауновски.

Тој упати апел до сите угостители да припазат на протоколите.

– Апелираме дека најголемиот дел од точките се применливи. Затоа апел до сите угостители, инспекторите се на терен и ќе бидат, се што ќе биде констатирано како нарушување на протоколите ќе постапуваме со казнени мерки, рече Пауновски.