УЕФА одлучи: Завршницата во ЛШ како никогаш досега – со Ф8 турнир
Европската куќа на фудбалот конечно одлучи како ќе ја приведе сезоната кон крајот во елитното европско натпреварување.
Како што пренесува „Билд“, но и шпански и англиски медиуми, ќе се игра завршен турнир Ф8 во Лисабон.
Ова значи дека на Истанбул ќе му се одземе организацијата на финалето во ЛШ бидејќи Турција во овие моменти е една од најзагрозените земји во Европа и во светот од пандемијата на коронавирусот.
УЕФА се одлучи организацијата да му ја додели на Лисабон, а во конкуренција беа уште два града, Франкфурт и Москва.
Планот е натпреварите да се играат на двата стадиони во Лисабон, „Луж“ и „Жозе Алваладо“, стадиони на кои настапуваат екипите на Бенфика и Спортинг. На овие два стадиони ќе се играат сите четвртфинални натпревари, потоа полуфиналињата и големото финале.
Списокот на учесници не е затворен бидејќи треба да се доиграат реваншите од осминафиналните натпревари помеѓу Барселона – Наполи (1:1), Манчестер сити – Реал Мадрид (2:1), Јувентус – Олимпик Лион (0:1) и Баерн – Челси (3:0).
УЕФА се одлучи завршницата која за прв пат ќе се игра со завршен турнир, ниту една екипа да нема предност на домашен терен.