Учениците бараат алтернативни начини за организација на забава
Откако Комисијата за здравство даде зелено светло за организација на свадби по посебно утврдени протоколи, дел од полуматурантите и матурантите изразија желба, на своја рака, во текот на последната недела од своето основно, односно средно образование, да организираат прослави.
Групното организирање генерациска прослава на матура или полуматура, сепак, не соодветствува со протоколите за организација на прослави и свадби, според кои максимумот на присутни луѓе треба да биде 100. Но, дел од учениците се надеваат дека барем во рамките на сопствениот клас ќе можат да организираат некоја прослава.
– Кога веќе пропуштивме екскурзии, барем да се видиме во живо со соучениците во некој ресторан. Верувам дека тоа може сега да се организира, кога веќе има протоколи за свадби. Не знам како точно, но можеби училиштата можат да направат некаков распоред и сите класови во посебни групи да организираат некоја мала прослава – вели за „Слободен печат“ матурантот Николај Василев од скопското средно училиште „Никола Карев“.
Покрај матурантите, и дел од помалите кои сега се полуматуранти, размислуваат за мала прослава во ресторан, а средствата за тоа планираат да ги соберат сами.
– Ќе имаме мала средба и ќе ја одбележиме полуматурата. Во ресторан, ќе се организираме, ќе собереме пари. Сите сакаме, бидејќи е спомен кој ќе остане во наредните години, сè што ќе остане од целото основно училиште до деветто одделение – вели за „Алсат“ полуматурантка од ОУ „Петар Здравковски Пенко“ .
Директорите на основните и средните училишта, засега не се огласија во врска со евентуална организација на матурска прослава.