Убиецот на Роберт Кенеди избоден во затвор во Сан Диего
Сирхан Сирхан, кој поради убиството на братот на некогашниот американски претседател и сенатор Роберт Кенеди служи затворска казна, бил хоспитализиран, откако друг затвореник го избодел со нож во затворот во Сан Диего.
Американското одделение за казни и рехабилитација соопшти дека чуварите брзо реагирале и го пронашле затвореникот со повреди од убод од нож, пренесува „Ен-Би-Си“.
„Тој е префрлен во болница надвор од затворот и моментално е во стабилна состојба“, стои во соопштението.
Функционери соопштија дека наводниот напаѓач бил идентификуван и изолиран од останатите затвореници, како и дека се очекува понатамошна истрага.
Сирхан Сирхан (75), бегалец од Палестина, на 5.јуни 1968 година пукаше во Роберт Боби Кенеди, во кујната од хотелот „Амбасадор“ во Лос Анџелес, откако тогашниот сенатор од Њујорк прогласи победа на изборите во Демократската партија во Калифорнија одржани претходниот ден.