Дури 18 поранешни кошаркари се уапсени во акција на американската полиција и се обвинети за измама.
Тие лажирале лекарски извештаи и со тоа сакале да ја измамат лигата и да наплатат околу четири милиони долари од здравственото осигурување на НБА.

Најпознати имиња кои се уапсени се тие на долгогодишниот играч на Мемфис гризлис, Тони Ален, потоа центарот Глен Дејвис, Дариус Мајлс и поранешниот НБА шампион Вил Бајнам.

Останатите кошаркари кои се уапсени се Милт Паласио кој еден дел од кариерата го помина играјќи во Партизан, Себастијан Телфер, Ентоан Рајт, Рубен Патерсон, Еди Робинсон, Грегори Смит, Џамарио Мун, Теренс Вилијамс, Алан Андерсон, Шенон Браун, Мелвин Илај, Кристофер Даглас-Робертс и Тони Ротен кој минатата сезона играше заедно со Нено Димитријевиќ во Хувентуд.

Кошаркарите се организирале уште во 2017 година и до 2020 година работеле заедно и поднесувале лажни барања за исплата за медицински и стоматолошки услуги кои никогаш не се случиле.

Лажните побарувања достигнале сума од 3.9 милиони долари, од што на кошаркарите им се исплатени 2.5 милиони долари.

Според телевизијата Ен-Би-Си, главен организатор на групата е Терел Вилијамс кои успеал да се поврзе со лекари за да добиваат лажни рецепти.