Косовската полиција уапси осумчлена криминална група која е осомничена за измама и проневера на големи количини пари.

Специјалното обвинителство во Приштина објави дека осомничените во овој случај намамиле и измамиле државјани на Германија преку онлајн платформата „Центар за повици“ која нуди инвестиции во разни акции, како и во криптовалути, понуди кои во овој случај биле измислени.

Во полициската акција се претресени 17 различни локации во Приштина и Феризај. Досега осуммина се уапсени. Уапсените лица се однесени во притвор по наредба на обвинителот, а се очекува да се појават пред истражен судија.

Специјалното обвинителство во Приштина ја спроведе акцијата во соработка со полициски истражители и генералниот обвинител во Бамберг, Германија.